වර්ජිනියා වෙරළේ අද්භූත පුද්ගලයා, එඩ්ගා කේසි : Miracle Man of Virginia Beach, Edgar Casey

ස්වයං මෝහන නිද්‍රාව මගින් ප්‍රගුණ කළ චිකිත්සා ක්‍රමයකින් දහස් ගණන රෝගීන්ට හා දුකට පත්වූවනට පිහිටවූ අරුම පුදුම පුද්ගලයෙකු ගැන කලකට පෙර ඇමෙරිකාවේ පමනක් නොව ලොව පුරා කථා බහට ලක්විය. එඩ්ගා කේසි (Edgar Casey) නමින් ප්‍රකටවූ ඔහු පසුගිය ශතවර්ෂයේ මුල් භාගයේ (1877- 1945) ඇමරිකාවේ ජීවත් වූවෙකි. නිව්යෝර්ක් නුවර පුවත්පත් විසින් " වර්ජිනියා වෙරළේ අද්භූත පුද්ගලයා " (Miracle Man of Virginia Beach) ලෙසින් හැඳින්වූ කේසිගේ මේ අපූරු හැකියාව ඔහුගෙන් උපකාර ලැබූ සැමට අරුමයක් විය.

ස්ටීව් නම් තරුණ සොල්දාදුවෙක් බෙටි නම් තරුණියක් සමග විවාහ ගිවිසාගෙන සිටියේය. යෞවනයේ මිහිර විඳිමින් ආදරයෙන් වෙලී සිටි මොවුන්ගේ දිවිය ඉතා සුන්දර විය. එහෙත්, දෛයිවයේ සරදමකට මෙන්, ඔවුනට නොසිතු විරූ දුක් කරදර රාශියකට මූනදීමට සිදුවිය, ඒ බෙටීට හදිසියේම වැළඳුනු දරුණු ආතරයිටිස් (Arthritis) රෝගය හේතුවෙනි. අනපේක්ෂිත ලෙස ඇයට මෙතෙක් ගතකල සුකුමාර ජීවිතය අතහැර වෛද්‍යවරුන් හා හෙදියන් ඇසුරේ කාමරයක කල් ගෙවන්නට සිදු විය.

වහාම සිය සේවයෙන් නිවාඩු ලබා බෙටී වෙත පැමිණි ස්ටීව්ට වෛද්‍යවරුන්ගෙන් දැන ගන්නට ලැබුණු ආකාරයට තම පෙම්වතියගේ තත්වය සතුටු දායක නොවීය. ඔවුන්ගේ සිහින මාලිගා බිඳ වැටෙමින් තිබින. මේ අතර මිතුරෙක් ස්ටීව්ට වර්ජිනියා වෙරළේ ජීවත් වන කේසි නම් පේන කියන්නා (Psychic) ගැන තොරතුරු පැවසීය. ඔහු අසා තිබු පරිදි කේසි යම්කිසි ආවේශයක් ලබා ඕනෑම රෝගයක් හොඳින් විනිශ්චය කර ප්‍රතිකාර සඳහා ඖෂද පවා නියම කරන්නට හැකියාවක් තිබෙන අයෙකු වන අතර පියවි සිහිය ඇතිවිට ඒ පිලිබඳ කිසිවක් සිහි නොවන සාමාන්‍ය පුද්ගලයෙකු විය . 

කේසිගේ මේ අරුම පුදුම හැකියාව ගැන මිතුරා තවදුරටත් මෙසේ පැවසීය. දිනක් කෙන්ටාකි නගරයේ වෛද්‍යවරයෙකු තම රෝගියෙකුගේ පාදයේ සුව නොකළ හැකි තුවාලයක් ගැන කේසිගෙන් විමසුවේය. කේසි තමාට පුරුදු නිද්‍රාවට පත්ව රෝගියා ගැන තොරතුරු විමසා 'ස්මොක් ඔයිල්' (smoke oil - දුං තෙල්) නමැති බෙහෙතක් ප්‍රතිකාර වශයෙන් නියම කළේය . නමුත් මෙම වෛද්‍යවරයා කිසි කලෙක 'ස්මොක් ඔයිල්' ගැන අසා නැතිවා පමණක් නොව විමසා බැලුවද කිසිම ඔසු හලක එවැනි බෙහෙතක් අලෙවි නොකරන බවද දැනගත්තේය. නැවත කේසි හමුවී 'කියවීමක්' ලබාගත් ඔහුට දැන ගන්නට ලැබුනේ එම බෙහෙත ලුවිස්විල් නම් නගරයේ එක්තරා  ෆාමසියකින් ලබා ගත හැකි බවයි.

වෛද්‍යවරයා වහාම එම ෆාමසිය අමතා බෙහෙත ගැන විමසූ නමුත් එවැනි බෙහෙතක් එහි නොමැති බව ඔහුට දැන ගන්නට ලැබී ඇත. මින් අධෛර්‍ය මත් නොවූ වෛද්‍යවරයා තෙවන වරටත් කේසි හමුවී 'කියවීමක්' ලබා ගෙන ඇති අතර ලැබුණු පිළිතුරෙන් විශ්මයට පත් වී ඇත. එනම් කේසි නියම කරනලද 'ස්මොක් ඔයිල්' බෝතලයක් ඉහත කිවූ ෆාමසියේ එක්තරා රාක්කයක වෙනත් බෙහෙත් බෝතල් පෙළකට පසුපසින් ඇති බවයි.

වහාම එම බෙහෙත් බෝතලය ගෙන්වා ගත් ඔහුට දැක ගත හැකි වුයේ දූවිලි වලින් වැසුණු බෝතලයේ 'ස්මොක් ඔයිල්' නම් සඳහන් වුනු ලේබලයක් ඇති බවයි.  එම බෙහෙත් නිපදවූ සමාගම බොහෝ කලකට පෙර වසා දැමූ බව ඔහුට පසුව දැන ගන්නට ලැබී ඇත. කෙසේ වෙතත් එම ප්‍රතිකාරයෙන් පසු රෝගියා සම්පුර්ණයෙන් සුවය ලබා ඇත. 

තමාගේ පෙම්වතිය වෙනුවෙන් ඕනෑම දෙයක් කිරීමට සුදානම් බව පැවසූ ස්ටීව් වහාම වර්ජිනියා වෙරළ බලා පිටත් විය. කුඩා වුවත් සුන්දර ලෙස නිමවුණු නිවසක ආලින්දයේ වාඩිවී සිටි කේසිව ඔහුට හමු විය.හීන්දෑරි තරමක් කුලෑටි ගතියකින් යුක්තවූ මේ මිනිසා කෙරෙන් තමන් බලාපොරොත්තු වූ ආකාරයේ පෙනුමක් ස්ටීව්ට දැක ගත නොහැකි විය.

වහාම තමා පැමිණි කාරණය දැන්වූ ස්ටීව්, " බෙටීට ඉතා අසාධ්‍යයි කරුණාකර ඇයට උදව් කරන්න......ඇය ඉතා සුවිශේෂ කෙනෙක්" යැයි බැගෑපත් වුනේය." හරි හරි හැමෝම එහෙම තමයි ඒ නිසයි මිනිස්සු මාව හමු වෙන්න එන්නේ, ඒත් ඒ පුළුවන් හැම දෙයක්ම කරලා බැරි වෙනකොට තමයි  " කියමින් ඔරලෝසුව දෙස නෙත් යොමු කල කේසි " කමක් නෑ දැන් ඊළඟ 'කියවීමට' වෙලාව හරි, අපි බලමු මොනවද එයා ගැන කියන්නේ කියලා" යැයි පවසා ස්ටීව් කැටිව නිවස තුලට ඇතුළු විය. කෑම කාමරය පසු කර කන්තෝරු කාමරයට ඇතුළුවූ ස්ටීව්ට කේසිගේ ලේකම් වරිය ග්ලැඩිස් මුණ ගැසිනි. තරමක් සිහින්, උස් වූ ග්ලැඩිස් ඒ වන විට අවුරුදු දාහතක් පමණ කේසිගේ කාර්යාලයේ සේවය කල අයෙකි.

ඇය පසු පස යාබද කාමරයට පියනැගූ ස්ටීව් තවත් විශ්මයට පත් විය. එම කුඩා කාමරය ඔහු බලා පොරොත්තු වූ පරිදි හඳුන් කූරු ආදිය දල්වා අලංකාරවත් කර නොතිබුණු සාමාන්‍ය කුටියක් විය. කබාය ගලවා පසෙකින් එල්වූ කේසි, තම ටයි පටිය බුරුල් කර අසල තිබූ සොපාවේ හාන්සි විය. කේසි මහත්මිය , ගර්ට්රුඩ් , ඔහුගේ සිරුර බ්ලැන්කට්ටුවකින් පෙරවූ සැනෙකින් ඔහු නින්දට ගොස් ඇති බවක් පෙනෙන්නට විය. කේසි  අසලින් වාඩිවූ ගර්ට්රුඩ් බෙටීගේ නම හා ලිපිනය කියෙව්වාය. මෙය ස්ටීව්ට ප්‍රෙහේලිකාවකි , මේ වන තුරුත් කිසිවෙකු බෙටීගේ රෝගය ගැනවත් රෝග ලක්ෂණ ගැනවත් විමසුවේ නැත. කේසි කෙමෙන් කෙමෙන් දොඩමලු වන්නට විය. බෙටීගේ නම හා ලිපිනය ඔහු නැවත වරක් කියෙව්වද වචන උච්චාරණයේ පෙරට වඩා වෙනසක් දකින්නට තිබුණි. 

" ඔව් අපට පේනවා මේ ශරීරය , තරුණ කාන්තාවක් විශාල කාමරයක් ඇතුලේ ඇඳක වැතිරිලා ඉන්නවා. එහි ජනේල තියෙන්නේ බටහිර හා දකුණු දිශාවලට මුණලා." සටීව් තැති ගත්තේය. " මේ ශරීරයට ආතරයිටිස් රෝගය වැළඳිලා තියෙන්නේ හේතු කීපයක් නිසා..." මෙසේ කේසි විසින් රෝගය විනිශ්චය කරන්නට වුයේ වෛද්‍යවරයෙකුට සුපුරුදු ව්‍යක්ත බවකිනි. ඔහු සඳහන් කරන්නට යෙදුනු ඇතැම් බැරෑරුම් වෛද්‍ය කරුණු ස්ටීව්ට 'ග්‍රීක් ' මෙන් විය. මේ සැම ඉතා අවධානයෙන් සවන් දීගෙන සිටි ලේකම්වරියගේ පැන්සල

වේගයෙන් සටහන් තබන්නට විය. විනාඩි පහළොවක් පමණ කල රෝග විනිශ්චය නිමාවූ පසු ප්‍රතිකාර නියම කෙරින. බෙහෙත් වට්ටෝරුවක් කියවූ අතර ආහාරයෙන් ප්‍රවේශම් විය යුතු බව අවධාරණය කෙරින. විශේෂ ස්නාන පිළිවෙලක්ද යෝජනා කෙරින.

දැන් ප්‍රශ්න තිබේනම් ඉදිරිපත් කරන්න යයි ඉල්ලා සිටි විට ස්ටීව් ඇසු ප්‍රශ්න කේසි මහත්මිය විසින් ඉදිරිපත් කර සිටියාය. ඒවාට නිසි පිළිතුරු ලබාදීමෙන් අනතුරුව " අපි දැන් නවතිමු " යයි පැවසු කේසි , බිරිඳගේ උපදෙස් අනුව කිසිවක් නොවූ විලාසයෙන් නැගී සිටියේය. ස්ටීව් තුෂ්නිම්භුතව බලා සිටින්නට විය. ක්‍රමයෙන් සිහි එලවා ගත් ඔහු පවසා සිටියේ එම කියවීම එතරම් නිරවද්‍ය ලෙස කෙසේ සිදුවුනිදැය් ඔහුට අදහා ගැනීමට නොහැකිවූ බවයි." මටත් ඇත්තටම බෑ " යන්න කේසිගේ පිලිතුර විය.

"මනෝ විද්‍යාඥයින් කීප දෙනෙක් ආව මේ ගැන පර්යේෂණ කරන්න , ඒ හැමෝම කතා කලේ උප විඥානය හා අධි මානසිකත්වය ගැනයි." තව දුරටත් අදහස් දැක්වූ කේසි ස්ටිව්ට පැවසුවේ ඔහු මුලින් මේ ගැන තරමක් චකිතයකින් සිටි නමුත් ප්‍රතිකාර සාර්ථක වන්නට පටන් ගත් පසු විශ්වාසය ක්‍රමයෙන් තහවුරු කරගත් බවත්ය. ඔහු වෙත පැමිණෙන්නට වූ නොයෙක්  වාර්තා කරුවන් හා පරීක්ෂකයන් ගැන කේසි සතුටු වූ බවක් හෝ කණගාටු වූ බවක් පෙනෙන්නට නොතිබිණ.

කෙන්ටාකි නගරයේ පිටිසරබද ගමක්වූ හොප්කින්ස්විල්හි සාමාන්‍ය ගොවි ප වුලක   උපත ලද එඩ්ගාර් කේසි , කුඩා කල සිටම යම් යම් සුවිශේෂ දක්ෂතා පෙන්වන්නට පුරුදුව සිටියේය. කුඩා අවධියේ පාඩම් පොතක් මත හිස තබාගෙන නිදාගැනීමෙන් පසු එය කට පාඩමින් දැනගැනීමට ඔහුට හැකියාවක් තිබුණි. තරුණ වියේදී කේසිට උගුරේ ආබාධයක් ඇතිවී කතාකිරීමේ අපහසුතාවයකට මුහුණ පාන්නට සිදු විය. මේ නිසා සති කීපයක්  කටහඬ සම්පුර්ණයෙන් නැතිවී ඉමහත් සිත් තැවුලකින් කල් ගෙවන්නටද ඔහුට සිදු වී ඇත. මෙයට නොයෙක් ප්‍රතිකාර කිරීමෙන් පලක් නොවූ හෙයින් දිනක් නගරයට පැමිණි මෝහනවේදියෙකු විසින්  මෝහනයට පත්කරවන ලදුව ඔහු තම රෝගයට තමා විසින්ම ප්‍රතිකාර නියම කරවා ගෙන සුවය ලද්දේය. කේසිගේ මෙම විශේෂ හැකියාව ගැන උනන්දුවූ කෙචම් නමැති පවුලේ වෛද්‍යවරයා කේසි මගින් තම රෝගීන්ගේ සුව නොකළ හැකි රෝග වලට ප්‍රතිකාර කල හැකිද යන්න අත්හදා බැලුවේය. ඔහුගේ එම පර්යේෂණ බෙහෙවින් සාර්ථක විය.

ඡායාරූප ශිල්පියෙකු ලෙස පුහුණුව ලැබූ එඩ්ගා එය තම ජීවිකාව කොටගෙන විවාහයෙන් පසු වෙනත් නගරයක පදිංචියට ගියේය. එහෙත් ඔහුගේ හැකියාවන් දත් වෛද්‍යවරු ඔහු පසු පස එන්නට විය. මේ අතර ඔහුගේ බිරිඳට දරුණු ලෙස කාස රෝගය වැළඳී මරණාසන්න විය. අවසානයේ ස්වයං මෝහණයට පත් එඩ්ගා විසින් නියම කරනලද ප්‍රතිකාරවලින් ඇය සම්පුර්ණ සුවය ලැබුවාය.

ක්‍රමයෙන් දියුණු කරගත් එඩ්ගාගේ මේ හැකියාව රෝග විනිශ්චය හා ප්‍රතිකාර වලට පමණක් සීමා නොවීය. ඔහුගෙන් කියවීම් ලබාගැනීමට දුර බැහැර සිට ටෙලිග්‍රාෆ් පණිවුඩ ගලා එන්නට විය. කෙතරම් දුර බැහැරක පදිචි අයෙකුගේ වුවද නම හා ලිපිනය දැනගනීමෙන් පසුව 'කියවීම්' ලබා දීමට එඩ්ගා කේසිට හැකි විය. නිව්යෝර්ක් නුවර පෞද්ගලික ටෙලිග්‍රාෆ් සමාගමක සේවිකාවකට මෙම කේසි නම් පුද්ගලයා වෙත ගලා එන පණිවුඩ දැකීමෙන් පසුව තමා ගැන කියවීමක් ලබාගැනීමේ කුතුහලයක් ඇතිවී කේසි වෙත පණිවිඩයක් යැවීය. ඇයට ලැබුණු උපදෙස වුයේ ඇය තම වර්තමාන වෘත්තිය ඇත හැර දැමිය යුතු බවත් කලා ක්ෂේත්‍රයේ ඇයගේ සැඟවුණු දක්ෂතා ඇති බැවින් ප්‍රචාරක දැන්වීම් කලාව වැනි වෘත්තියක් තෝරා ගැනීම වඩා උචිත බවත්ය 

ඒ වන විටත් තිස් හයවන වියේ පසුවූ ඇය මේ යෝජනාව ගැන මුලදී පුදුම වූවත් තවදුරටත් සිතා බලා එම වෘත්තියට යොමුවූ අතර ටික කලකින් ඉතා දක්ෂ කලා ශිල්පිනියක බවට පත්වී විශාල වශයෙන් අදායම් ලැබීය. පසුව ඇය ජීවත්වූ නිවසේ ආලින්දයේ විශේෂ තැනක් කේසිගේ පින්තුරයකට වෙන්කර තිබූ බව පැවසේ.

කේසිගේ කියවීම්වල දකින්නට ලැබුණු තවත් විශේෂත්වයක් සඳහන් කිරීම අපරදිග වාසි අපට ඉතා වැදගත් වනු ඇත. ඔහුගේ රෝග විනිශ්චයේදී බොහෝවිට රෝගියාගේ පෙර ආත්ම භාවයන් ගැන සඳහන් කිරීම නොයෙක් අවස්ථාවලදී දකින්නට ලැබී ඇත. එහිදී එම රෝගය හෝ වෙනත් කරදර වලට හේතු වශයෙන් කේසි එම තැනැත්තා පෙර භවයක සිදු කල 'කර්මයක්' හේතුවන බව පැවසු අවස්ථා බොහාමයකි. එවැනි අවස්ථාවල කේසිගේ උපදෙස වී ඇත්තේ එවැනි පෙර කර්මයන්ගෙන් මිදීමට තමන් දැනට ලබා ඇති ආත්ම භාවයේදී වග බලාගතයුතු බවත් , ඒ සඳහා පිලිපැදියයුතු ක්‍රියා මාර්ග ගැනත්ය.

මෙම කියවීම් කේසි විසින් ජීවන කියවීම් ( Life Readings ) ලෙස හැඳින්වුයේ කලින් සඳහන් කල කායික කියවීම් වලින් වෙනකොට හඳුනා ගැනීමට විය යුතුය. මෙම ජීවන කියවීම්වලදී පෙර ආත්ම  වල අන්‍යෝන්‍ය පුද්ගල සම්බන්ධතා (ඥාති සම්බන්ධතා, මිතුරුකම් ආදිය ) ගෙනහැර දක්වමින් ඒ අනුව එම පෙර සම්බන්ධතාවයන් නොයෙක් අයුරින්, ක්‍රමානුකුලව, ආත්මයක් පාසා, ගොඩනැගෙන ආකාරය විස්තර කොට ඇත. 

වරෙක කේසිගේ ඥාතිවරයෙකු බලවත්ලෙස රෝගාතුරව වැතිරසිටින විට ඇයගේ සොහොයුරිය ලවා කේසිගේ උපකාරය පැතීය. ගැබිනියක්ව සිටි ඇය වැඩි කලක් ජීවත් නොවනු ඇතැයි වෛද්‍යවරු නිගමනය කර තිබු අතර කේසිගේ උපකාරය ගතයුතු බවට යම් කෙනෙක් ඇයට සිහිනෙන් පවසා තිබුණි. ඇයගේ පණිවිඩය ලද වහාම කේසි සුපුරුදු පරිදි සොපාවේ හාන්සි වී කාන්තාවගේ රෝග තත්වය විමසා බලා ඇයගේ ජීවිතය පිළිබඳව එතරම් විශ්වාසයක් තැබිය නොහැකි බව දන්වා ඇත. කෙසේ නමුත් ඇයට දරුවා ලැබෙන තෙක් ජීවත්වීමට ප්‍රතිකාරයක් නියම කර තිබුණි. එම උපදෙස් අනුව වෛද්‍ය ප්‍රතිකාර ලබා දීම නිසා රෝගියාගේ තත්වය යහපත් අතට හැරී ඇති නමුත් සති කිහිපයකට පසුව දරුවා බිහිකර නොබෝ වෙලාවකින් ඇය මිය ගිය බව කේසිට දැනගන්නට ලැබී තිබුණි.

මේ පිලිබඳ කේසි තම දින පොතේ මෙසේ සඳහන් කොට ඇත.

" අවුරුදු දෙකකට පමණ පසුව කිසියම් කටයුත්තක් සඳහා මා එම දරුවා ජීවත්වූ නගරයට ගොස් සිටියා. එහෙත් මම ඒ දරුවා හෝ ඇගේ පියා කිසි දිනෙක හැඳිනගෙන සිටියේ නෑ . එදින මා කොණ්ඩය කපා ගැනීම සඳහා බාබර් සාප්පුවකට ගොඩ වැදී මගේ වාරය එන තෙක් වාඩිවී සිටියා. එවිට මා අසල දුව පනිමින් සිටි කුඩා දැරියක් එක වරම නැවතී ටික වෙලාවක් මාදෙස බලා සිට දුව ඇවිත් මගේ ඇකයේ වාඩිවී අගේ කුඩා දෑත් මගේ බෙල්ල වටා යවා මා වැළඳ ගත්තා. ඇය ගැන විමසිලිමත්ව රැවුල බාමින් සිටි අගේ පියා බාබර්ගෙන් මා කව්දැයි අසා දැනගෙන මා වෙත පැමිණ මෙසේ ඇසුවා :

"මේ දරුවා කිසිවෙකු සමග මෙතරම් කුළුපග වනු මා දැක නෑ ඔබ හිතනවාද ඔබ ඇගේ මවට උපකාර කළා කියා ඇයට යම්කිසි විධියකින් දැනුනාය කියා?". "ඇත්තෙන්ම ඔහුගේ ඒ පැනයට මම තවමත් පිළිතුරු සොයමින් සිටිමි " යයි කේසි තම දින පොතේ සටහන අවසන් කර ඇත.

කේසිගේ මෙම අපුරු හැකියාවන්ගෙන් ප්‍රයෝජන ගැනීමට වෙහෙසුනු අය අතර පොලීසියද අයත්ය. විසඳීමට නොහැකි අපරාධ පරීක්ෂනවලදී කේසිගේ කියවීම්වල ආධාරයෙන් අපරාධකරුවන් කොටුකරගත් අවස්ථා කීපයක් ගැන සඳහන්වේ.

කෙසේ වෙතත් ඔහුගේ මෙම සුවිශේෂ හැකියාව අනවශ්‍ය ලෙස ප්‍රයෝජනයට ගැනීමට නොහැකි වී ඇති බවටත් සාක්ෂි ඇත. එවැනි නොයෙක් යෝජනා ඔහු වෙත ගලා එන්නට විය. වරක් එකතරා කපු වෙළෙන්දෙක් තම වෙළඳාම සම්බන්ධයෙන් දිනපතා උපදෙස් ලබා ගැනීමේ අටියෙන් විශාල ගෙවීමක් කිරීමට ඉදිරිපත් වී ඇත. එහෙත් එඩ්ගා කේසි එය ප්‍රතික්ෂේප කළේය.

මෙවැනි කී නොකී බොහෝ විස්තර අඩංගු ඔහු ගැන ලියැවී ඇති පොත් රාශියකි. එම පොත් බොහොමයකට පසුබිම් වී ඇත්තේ මුල් කාලයේ  සිටම කේසි තම ලේකම්වරිය ලවා පිටපත් කර තබාගත් කියවීම් වර්තාය. මෙම ලිපිය  සඳහා ඇසුරු කරගත් එම පොත් වලින් කීපයක් පහත සඳහන්වේ,

Many Mansions - Gena Cerminara

Edgar Casey , My life as a Sear: Lost Memories - A Robert Smith

The Story of Edgar Casey : There is a River - Thomas Sugru

Edgar Casey's Story of Kamma - Mary Woodward

මේ අතර වඩාත් ජනප්‍රියත්වයට පත් ජිනා සමිනාරාගේ" මෙනි මැන්ෂන්ස් " කලකට ඉහත පුජ්‍ය කන්නිමහර සුමංගල හිමියන්  විසින් ' සංසාර මන්දිර' නමින් සිංහලට පරිවර්ථනය කරන ලදී. කේසිගෙන් පසු ඔහුගේ පුත් හියුලීන් කේසි විසින් තම පියාගේ විශ්මයජනක කියවීම් වාර්තා සුරක්ෂිතව තබා ගත්තා පමණක් නොව මෙම විෂය පිළිබඳ උනන්දුවක් දක්වන හා වැඩිදුර පර්යේෂණ කිරීමට කැමති අයගේ ප්‍රයෝජනය සඳහා The Association for Research & Enlightenment (ARE) නමින් දැනට ලොව සුපතල පර්යේෂණ ආයතනය වර්ජිනියාහි පිහිටුවීමට කටයුතු කර ඇත.